Bylaws

Art. 1 Num, sedia ed onn da gestiun

Sut il num „Wikimedia CH" – uniun per la promoziun da la savida libra – numnada en il proxim text „uniun" – exista in'uniun tenor artitgel 66 ss. dal Cudesch civil svizzer.
La sedia da l'uniun è Turitg.
L'onn da gestiun è l'onn chalendar.
La communicaziun entaifer l'uniun succeda en la lingua dals suprastants.

Art. 2 Finamiras ed incumbensas

L'intent da l'uniun è da promover la producziun, rimnada e derasaziun da cuntegns libers (engl. Open Content) en moda na lucrativa, per pudair promover l'egualitad da las schanzas tar l'access a savida e furmaziun. Cuntegns libers en il senn da l'uniun èn tut las ovras, ch'èn messas da lur autur sut ina licenza, che lubescha a mintgin da derasar e d'adattar las ovras gratuitamain. Latiers duai er l'enconuschientscha per dumondas socialas e filosoficas vegnì rinforzadas.
Tar la rimnada e la derasaziun da cuntegns libers duain en emprima lingia, na dentant betg sulettamain, Wikis vegnir en acziun. Wikis èn sistems da software ch'èn accessibels sur l'internet, e che pussibilitescha als utilisaders l'access tar ils cuntegns sco er la pussaivladad da midar quests e da scriver novs. In exempel enconuschent per quai princip è l'enciclopedia libra „Wikipedia" ch'è vegnida iniziada da Larry Sanger e Jimmy D. Wales e che vegn manada da la fundaziun Wikimedia.
L'uniun parta sias finamiras cun la Wikimedia Foundation Inc., ina organisaziun d'util public cun sedia a Florida en l'USA. La Wikimedia Foundation coordinescha las activitads tenor las finamiras da l'uniun en il sectur internaziunal ed administrescha il nums dals differents projects internaziunals da Wikimedia.
Las finamiras principalas da l'uniun èn:
il manaschi ed il sustegn finanzial da sistems d'internet per la producziun, rimnada e derasaziun da cuntegns libers. La prioritad duai dentant vegnir messa sin ils differents projects da Wikimedia internaziunals.
la derasaziun e la promoziun da la derasaziun da cuntegns libers en autras furmas, p. ex. en furma digitala u en furma stampada, cun prioritad sin ils cuntegns da las differentas paginas dals projects internaziunals da Wikimedia.
la procuraziun, preparaziun e derasaziun d'infurmaziuns, sco er la lavur publica tar il tema cuntegns libers, Wikis ed ils differents projects da Wikimedia. Quai duai p. ex. Succeder entras arranschaments e material d'infurmaziun.
da sclerir dumondas scientificas, socialas, culturalas e giuridicas en connex cun cuntegns libers e Wikis p. ex. entras expertisas, studis e la surdada da stipendis.
La promoziun dal stgomi e la collavuraziun tranter ils differents projects en las differentas linguas, cunzunt en las linguas tudestg, franzos, talian e rumantsch sco er ils differents dialects dals projects da Wikimedia alemans.
L'uniun po era procurar per meds, uschè lunsch che quests vegnan impundids per ils sura numnads intents, per autras corporaziuns favurisadas fiscalmain resp. dal dretg public e transmetter quests a quellas sco er sa participar a talas cooperaziuns u daventar commember.
L'uniun persequitescha sulettamain e direct finamiras da l'util public. Ella è activa en moda e maniera altruistica e na persequitescha betg en emprima lingia atgnas finamiras economicas.
Ils meds da l'uniun pon sulettamain vegnir utilisads per las finamiras statuarias. Ils commembers n'obtegnan en lur posiziun da commember betg donaziuns da l'uniun. Ils commembers na dastgan tar la schliaziun da l'uniun betg retschaiver parts da la facultad da quella. Persunas n'astgan betg vegnir privilegiadas cun indemnisaziuns sproporziunadas u che cuntrafan a l'intent da l'uniun.

Art. 3 Commembranza

Commember sa mintga persuna natirala u giuridica daventar.
L'uniun consista or da commembers activs, commembers promoturs e commembers d'onur.
Commember activ po mintga persuna natirala daventar, che vul sa participar activ en l'uniun u ad in project che vegn sustegnì. Commember promotur po mintga persuna natirala u giuridica daventar, che na sa participescha betg activ, che vul dentant sustegnair las finamiras ed incumbensas da l'uniun.
Sco commember d'onur pon persunas natiralas vegnir nominadas, ch'èn s'engaschadas en speziala moda e maniera per l'uniun. Per quai è in conclus da la radunanza necessari.

Art. 4 Dretgs e duairs dals commembers

Ils commembers èn autorisads da sa participar a tut las occurrenzas purschidas da l'uniun. Ultra da quai han els il dretg da far propostas a la suprastanza ed a la radunanza.
Ils commembers èn obligads da sustegnair l'uniun e sias finamiras – er en la publicitad – sco er da pajar la contribuziun annuala punctualmain tenor il reglament da contribuziuns actual. Els èn ultra da quai er obligads da communitgar immediat a l'uniun la midada d'adressa postala u electronica. Per consequenzas che resultan ordlonder, ch'il commember n'ademplescha betg sias obligaziuns, e il commember sez responsabel e deliberescha l'uniun da tut la responsabladad.
Commembers activs han il dretg d'eleger activ e passiv sco era il dretg da proposta, da votar e da pledar a las radunanzas.
Commembers promoturs han il dretg da proposta e da pledar a las radunanzas, dentant nagin dretg da votar u dretg d'eleger.
Commembers d'onur èn deliberads da la contribuziun annuala ed han uschiglio ils medems dretgs e duairs sco ils commembers activs.

Art. 5 Cumenzament e fin dal commembranza

Per daventar commember dovra quai ina dumonda a scrit per posta u e-mail a la suprastanza. Sur da la dumonda da recepziun decida la suprastanza cun ina simpla maioritad da vuschs. La suprastanza n'è betg obligada da menziunar ils motivs da refusa. Il requirent refusà po pretender che la radunanza generala decidia sur da la dumonda per daventar commember.
La commembranza finescha entras l'extrada voluntaria, exclusiun, mort dil commember u entras sperdita da la capacitad giuridica tar persunas giuridicas.
L'extrada sto succeder tras in'abdicaziun a scrit trais mais avant la fin da l'onn da gestiun a la suprastanza. Sin explicit giavisch po l'extrada era succeder immediat. En quai cas han las contribuziuns da l'onn current tuttina da vegnir pajadas.
L'exclusiun immediata d'in commember ord in impurtant motiv po vegnir proclamada, sch'il commember cuntrafa als statuts u als interess da l'uniun. La suprastanza po decider sur da l'exclusiun d'in commember cun dus terz da las vuschs. 2 emnas avant quella decisiun è da dar al commember la pussaivladad da prender posiziun cunter las rinfatschas. Commembers exclus pon inoltrar in recurs tar la suprastanza per mauns da la radunanza dals commembers entaifer 30 dis. Quai recurs vegn tractà a la proxima radunanza ordinaria dals commembers. A questa radunanza han ton la suprastanza sco era il recurrent la pussaivladad da prender posiziun a bucca u a scrit. La radunanza dals commembers decida suenter cun maun pli.
Tar la terminaziun da la commembranza, n'emporta betg ord tge motiv, spiran tut ils dretgs da commember. Ina restituziun da contribuziun, donaziuns u autras prestaziun è da principi exclusas. Quai na vala betg per las pretensiuns da contribuziuns che n'èn anc betg vegnidas pajadas.
La commembranza va a fin, sch'il commember na paja betg la contribuziun annuala. Arriva il pajament da la contribuziun annuala betg enfin il termin inditgà, suonda in'admoniziun. A quella suonda suenter almain 30 dis ina segunda admoniziun. Il commember vegn stritgà da la glista da commembers il pli baud duas emnas suenter che la segunda admoniziun è vegnida tramessa. Tut las admoniziuns ston vegnir fatgas a scrit. La suprastanza decida la persuna u las persunas che han la cumpetenza e la responsabladad da stritgar commembers da la glista cun in simpel conclus. Il commember vegn infurmà a scrit, ch'el è vegnì stritgà da la glista. La suprastanza vegn era infurmada a moda e maniera adequata davart il conclus.

Art. 6 Contribuziun da commember

L'autezza da la contribuziun da commember vegn fixada a la radunanza da commembers.

Art. 7 Organs da l'uniun

Organs da l'unin èn:

la radunanza da commembers
la suprastanza
il post da revisiun

Art. 8 Radunanza da commembers

L'organ suprem è la radunanza da commembers. La radunanza da commembers ha da decider sur da dumondas da principi e sur da fatschentas da l'uniun. Ella ha en spezial ils suandants pensums:
eleger la suprastanza ed il post da revisiun,
approvar il rapport ed il quint annual ed il rapport dal post da revisiun,
approvar il preventiv annual,
dar scarica a la suprastanza ed il post da revisiun,
fixar la contribuziun da commembers,
approvar midadas dals statuts,
tractar e decider davart da proposiziuns inoltradas,
tractar e decider davart da fatschentas che la suprastanza ha preparà,
decider davart d'ina eventuala schliaziun da l'uniun.
La suprastanza ha da convocar ina giada per onn la radunanza da commembers. Ella ha d'avair lieu en l'emprima mesadad da l'onn. L'invitaziun ensemen cun la glista da tractandas ed eventualas propostas ch'èn gia avant maun stoncuntanscher ils commembers per posta u e-mail almain otg emnas avant. Giavischs per midadas u amplificaziuns da la glista da tractanda e da las propostas d'elecziun, sco er proposiziuns dals commembers ston cuntanscher la suprastanza quatter emnas avant la radunanza da commembers.
Proposiziuns fatgas pli tard u era durant la radunanza da commembers, exclus midadas da statuts, ston figurar sin la glista da tractandas, sche la maioritad dals preschents acceptan quai (propostas urgentas).
Ina radunanza da commembers extraordinaria ha la suprastanza da communitgar immediatamain cun ils exacts motivs, sche l'interess da l'uniun pretenda ina tala radunanza. Ils commembers pon er giavischar ina radunanza da commembers sche 10% dals commembers, dentant almain 10 commembers pretendan quai. Il giavisch per ina tala radunanza è d'inoltrar a scrit cun inditgar las finamiras ed ils motivs a la suprastanza.
Decisiuns da la radunanza da commembers vegnan scrits en in protocol. Quel vegn mess a disposiziun entaifer 60 dis suenter la radunanza als commembers. Approvà vegn quel a la proxima radunanza da commembers.

Art. 9 Dretg da votar / cumpetenza da decider

Mintga commember che ha il dretg da votar ha ina vusch. Il dretg da votar n'è betg transferibels.
Mintga radunanza da commembers ch'è vegnida convocada confurm a l'urden è cumpetenta da decider.
La radunanza da commembers prenda lur decisiuns cun maun pli da las vuschs valaivlas. Tar in'egualitad da las vuschs vala la proposiziun sco refusada.
Per midadas da statuts e la decisiun per schliar l'uniun basegna quai la maioritad da dus terz da las vuschs inoltradas.

Art. 10 Suprastanza

La suprastanza sa cumpona d'in president/presidenta e da 4-6 ulteriurs commembers.
Ils commembers da la suprastanza vegn elegida per in onn. Pliras reelecziuns èn pussaivlas. Il temp d'uffizi da la suprastanza veglia finescha 60 dis suenter l'elecziun da la nova suprastanza. En quai temp ha l'anteriura suprastanza da surdar las fatschentas confurm a l'urden a la nova suprastanza.
La suprastanza prenda decisiuns cun maun pli. Tar in'egualitad da vuschs dat il president la vusch da tagl. La suprastanza è abla da decider, sche almain la mesadad dals commembers da la suprastanza prendan part a la votaziun. Las decisiuns da la suprastanza vegn protocollada. La suprastanza communitgescha regularmain, dentant minimum mintga 2 mais, davart activitads passadas e futuras, sco era davart ils impurtants conclus. La suprastanza sa constituescha sezza.
La suprastanza regla u deleghescha las fatschentas da l'uniun che n'èn tenor ils statuts betg suttamessas ad in auter organ.
La suprastanza rapporta a la radunanza da commembers davart da lur lavur.
Giuridicamain valaivel per l'uniun è mo la suttascripziun da dus commembers da la suprastanza.
La responsabladad da la suprastanza sa restrenscha sulettamain sin intenziun e negligientscha.

Art. 11 Post da revisiun

Il post da revisiun consista ord dus revisurs. Ils revisurs na dastgan betg esser commembers da la suprastanza u emploiads da l'uniun. Els vegnan elegì per in onn da la radunanza da commembers. Pliras reelecziuns èn pussaivlas.
Il post da revisiun controlla ils cudeschs e la cassa, sche quella lavur na vegn betg delegada ad in post fiduziar. El suttametta a la radunanza da commembers annualmain in rapport cun la proposiziun argumentada d'approvar u da nun approvar il quint annual.
Il post da revisiun po da tut temp avair invista en la contabilitad.

Art. 12 Finanzas

La suprastanza è responsabla per la contabilitad principala da l'uniun e l'administraziun da la facultad.
Per las obligaziuns da l'uniun stat exclusivamain la facultad da l'uniun bun. Ils commember n'han betg da star bun per obligaziuns da l'uniun.

Art. 13 Schliaziun da l'uniun

Tar la schliaziun u l'aboliziun da l'uniun u sche l'intent da l'util public croda vegn la facultad da l'uniun surdada ad ina corporaziun dal dretg public u ad ina corporaziun favurisada fiscalmain per promover la savida tenor il senn da quests statuts. Il retschavider vegn definì ensemen cun la decisiun da la schliaziun da l'uniun.
Ils commembers da la suprastanza fingeschan sco liquidaturs, uschè lunsch che la radunanza da commembers na decida betg insatge auter.